सवारी दुर्घटना न्युनिकरण हुन सकेन ,नवलपुरमा एक बर्षमा दुर्घटनामा परि ९७ जनाको मृत्यु

By

सदिक्षा गैरे / कावासोती
कावासोती ५ असार । नवलपुर जिल्लामा सवारी दुर्घटना न्युनिकरणका लागि प्रयासहरु भईरहेपनि त्यो प्रभावकारी देखिएको छैन । अघिल्लो आर्थिक बर्ष भन्दा गत आर्थिक बर्षमा सवारी दुर्घटनाको संख्यामा बृद्धी भएको छ । आ.व. ७५ / ७६ मा जिल्लामा कुल १ सय ६१ वटा सवारी दुर्घटना भएको थियो । आ.व. ७४ / ७५ मा भने ७७ सवारी दुर्घटना भएका थिए । जिल्ला ट्राफिक प्रहरी कार्यालयले दिएको जानकारी अनुसार एक बर्षको अवधिमा ९७ जनाले सवारी दुर्घटनामा परि ज्यान गुमाएका छन । ति दुर्घटनाहरुमा परेर २९३ जना घाईते भएको जिल्ला ट्राफिक प्रहरीले जानकारी दिएको छ । घाईते मध्ये १२९ जना गम्भिर र १७२ जना सामान्य घाईते भएका थिए । आ.व. ०७४ / ७५ मा भने जिल्लामा ६३ जनाले सवारी दुर्घटनामा परि ज्यान गुमाएका थिए । दुर्घटनामा परि ८५ जना गम्भिर र ७९ जना सर्ब साधारण घाइते भएका थिए । ट्राफिक प्रहरी कार्यालयले बर्षभरिनै जिल्लामा ट्राफिक सचेतना कार्यक्रम संचालन गरेपनि दुर्घटनामा भने कमी आउन सकेको छैन । सडकको अबस्था , सवारी चालकको लापरवाही आदीले गर्दा दुर्घटनाको मुख्य कारण रहेको ट्राफिक प्रहरीको भनाई रहेको छ । आ.व. ०७५ / ०७६ मात्र जिल्ला ट्राफिक प्रहरी कार्यालयले ३ हजार ८ सय ९५ जना बिद्यार्थीलाई ट्राफिकको नियम बारेमा जानकारी गराएको थियो । यसैगरि कार्यालयले ११ हजार भन्दा बढी चालक र सहचालकहरुलाई ट्राफिक कार्यालयले सवारी ऐन नियम र ट्राफिक नियमका बारेमा जानकारी गराएको थियो । ७ हजार ३ सय ९३ जना सर्वसाधारणहरुलाई प्रत्यक्ष रुपमा ट्राफिक सचेतना कार्यक्रममा सहभागिता गराईएको थियो । जिल्ला ट्राफिक प्रहरी कार्यालयले दिएको जानकारी अनुसार बिभिन्न चार स्थानमा गरिएका बृहद् अन्र्तक्रिया कार्यक्रममा ३ सय ५५ जना सहभागि थिए । जिल्ला ट्राफिक प्रहरी कार्यालयले गत आर्थिक बर्ष ०७५ / ०७६ मा एक करोड भन्दा बढी राजश्व संकलन गरेको छ । नवलपुरबाट गत आर्थिक बर्ष ०७५ / ०७६ मा १ करोड २ हजार राजश्व संकलन भएको हो । बर्ष भरि गरिएका कुल १६ हजार ६ सय १९ कारवाहीबाट यो राजश्व संकलन गरिएको हो ।

You may also like